Kitob va Telefon haqida ertak
Bitta uyda yashaydi,
Ikki sinfdosh, o‘rtoq.
Komil birining ismi,
Fe'li biroz chatoqroq.
Qo‘lidan hech tushmaydi,
Telefon degan matoh
Ishi ham yurishmaydi,
Darslardan emas ogoh!
Nuqul o‘ynaydi o‘yin,
Kitobni ko‘p xushlamas.
O‘qishga egmas bo‘yin.
Shundan aqli peshlamas.
Ikkinchisini ko‘rsang,
Diling yashnab ketadi.
Aqli ham qaynar bilsang,
Peshqadam, u - ilgari!
Qo‘lidan tushmas kitob,
Bilimli, zo‘r odobli.
Yuzi misoli oftob,
Vaqti doim hisobli.
Uning do‘stlari - Kitob,
O‘rganar undan odob.
O‘qishni va hisobni,
Husnixatni, yozmoqni.
Duch kelishdi ikkovi,
Bir kun ko‘cha boshida.
Rosa tunddir birovi,
Birin qo‘li ko‘ksida!
Biri ko‘tarmay boshin,
Telefonda o‘ynaydi.
Birisi etib ta'zim,
Ko‘ngillarni chog‘laydi.
Birdan yorishib osmon,
Mo‘jiza ro‘y beribdi.
Telefon, Kitobga jon,
Va bir imkon beribdi.
Rostini so‘zlang, - debdi,
O‘zingiz haqingizda.
Yolg‘onni qo‘shmang, - debdi,
Tanlash vaqti keptida!
Kitob debdi: - Men o‘rtoq,
Uyingda go‘yo oftob.
Yordamga shayman har choq,
Men bilan dunyoga boq.
Telefon der: - O‘ynagin,
Men bilan maza qilib.
Kel, yo‘lingni burmagin,
Biroz yayra, miriqib.
Menda har - xil o‘yinlar,
Sira qilmaysan afsus
Qiziq multfilmlar,
Ko‘rib yayraysan hoy qiz!
Kitob: - O‘yin ham kerak,
Darslarni qilgandan so‘ng.
Puxta o‘qisang demak,
Darsda o‘tirmaysan gung.
Qiziq har bir sahifam,
Rang-barang mavzulari.
Yo‘l ko‘rsatmoq vazifam,
Porloq kelajak sari.
Qani, ayt yana ne bor,
Senda o‘yindan bo‘lak?
Ilmsiz bo‘ladi xor,
Senda nima bor kerak?
Telefon egibdi bosh,
So‘z topolmay qolibdi.
Kitob chimiribdi qosh,
Sekin yo‘lga solibdi.
Avval aqlingni peshla,
Qani qo‘limdan ushla.
O‘rgatay senga bilim,
Har ishga kerak ilm.
Do‘stlaring ham ko‘payar,
Senga havasla boqar.
Men bilan bo‘lsang o‘rtoq,
Vaqting ham o‘tadi chog‘.
Qo‘lni beringlar qo‘lga,
Tezroq tushamiz yo‘lga.
Bizni kutmoqda o‘rtoq,
Kelajagimiz~porloq!
Shundan so‘ngchi,
Komiljon,
Kitobla do‘st bo‘libdi.
Hamma bo‘lganmush
hayron,
Aqli kuchga to‘libdi!
Qani, o‘ylab ko‘ringchi,
Sizlar kimga o‘rtoqsiz?
Ko‘ngil ochar o‘yinmi,
Yo, kitobga mushtoqsiz?!
Nilufar HASANOVA
Ctrl
Enter
Xato topdingizmi
Bizga junating Ctrl+EnterBoshqa ma`lumotlar:
Izohlar (0)