Bog’chada 6 yoshli qizaloq vafot etdi

Ijtimoiy tarmoqlarda Yangiobod tumanidagi 2 son DMTT tarbiyalanuvchisi (qiz bola) DMTTida vafot etganligi haqida xabar tarqaldi. Holat yuzasidan Jizzax viloyat MTB munosabat bildirdi. 
Qayd etilishicha, Yangiobod tumanidagi 2 son DMTTida 2021-yil 30-iyun kuni 2015-yilda tugʻilgan voyaga yetmagan 6 yoshli tarbiyalanuvchi DMTT ga yaxshi holatda kelgan. 
Shifokor tomonidan tibbiy tekshiruvdan oʻtkazilgandan soʻng tarbiyachi va yordamchi tarbiyachi tarbiyalanuvchini qabul qilib olgan. Tushlikdan soʻng tarbiyachilar tomonidan bolalarga sogʻlomlashtiruvchi badantarbiya mashgʻulotlari oʻtilib, bolalar uyquga yotqizilgan. 
Shu kuni taxminan 14:30lar atrofida yordamchi tarbiyachi tomonidan bolalar uyqudan uygʻotilganda tarbiyalanuvchining bezovtalanayotgani yaʼni, burni qonayotgani maʼlum boʻladi tarbiyachi shu zahotiyoq tez tibbiy yordamga murojaat qilgan. Va bu haqda tuman maktabgacha taʼlim boʻlimiga xabar berilgan. 
Holat yuzasidan Yangiobod tuman prokuraturasi tomonidan tergovga qadar tekshiruv harakatlari oʻtkazilgan boʻlib, tarbiyalanuvchining vafoti yuzasidan toʻplangan hujjatlar Oʻzbekiston Respublikasi Jinoyat Protsessual kodeksining 83-moddasi 2-qismi bilan Jinoyat ishi qoʻzgʻatilish rad etildi.