Ilk hadis toʻplamlari

Aziz muxlislar. Ramazon oyi munosabati bilan har kuni saharlik vaqtida Siz azizlar uchun hadisi sharifdan iqtiboslar berib boramiz.
Ramazon oyi muborak boʻlsin!
Sahobalar orasida Abdulloh ibn Amr ibn al-Oss (616-684) hadislarni yozib olishi bilan shuhrat qozongan edi. Bu haqida uning oʻzi bunday rivoyat qilgan: “Men Paygʻambardan sollallohu alayhi va sallam eshitgan har bir narsani uni saqlab qolish maqsadida yozib olar edim. Bundan meni qurayshliklar qaytardilar. “Eshitgan har bir narsani yozib olaverasanmi?! Axir, inson gʻazablanishi, rozi boʻlishi mumkin” dedilar. Men yozishdan toʻxtab qoldim. Soʻng bu haqida Paygʻambarga sollallohu alayhi va sallam gapirib berdim. Ul zot barmoqlari bilan ogʻizlariga ishora qildilar va “Yozaver, nafsim qoʻlida boʻlgan zot – Allohga qasamki, bu ogʻizdan faqatgina haqiqat yuzaga chiqadi”, dedilar.

Ilmni mustahkamlash

Yana Abdulloh ibn Amr ibn al-Ossning (r.a.) bunday rivoyat qilgani muhaddislar tomonidan keltirilgan:
قيّدوا العلم. قلت و ما تقييده؟ قال كتابتهBoshqa sahobalarning ham xuddi shunday deb nasihat qilganlarini muhaddislar naql qilganlar.
Abu Iso at-Termiziy (825-892) ham “Ilm kitobi”da hadislarni yozib olishga berilgan ruxsat haqida alohida bob ajratgan. Unda Abu Hurayradan roziyallohu anhu bir hadis rivoyat qilingan: bir ansoriy Paygʻambar sollallohu alayhi va sallam oldilarida oʻtirar edi. U Paygʻambardan sollallohu alayhi va sallam ajoyib hadislarni eshitib, juda taajjubga tushardi. Lekin ularni yodlab ololmasdi. Shunda u Paygʻambarga sollallohu alayhi va sallam bu borada shikoyat qiladi. “Men sizdan ajoyib hadis eshitdim. Lekin yodlab ololmay qoldim”, deganida, Paygʻambar sollallohu alayhi va sallam: “Oʻng qoʻlingni yordamga chaqir!”, deb oʻng qoʻl bilan hadisni yozib olishga ishora qilganlar.