Yoʿl haqi narxlari koʿtarildi

Oʻzbekistonda shaharlararo avtobusda sayohat qilish uchun yoʻl haqi narxlari yil boshidan buyon oʻrtacha 9,4 foizga oshgan. Bu haqda Davlat statistika qoʻmitasi maʻlumot berdi.
Unga koʻra, noyabr oyidagi shaharlararo qatnovchi avtobuslarda yoʻl haqi oktyabr oyiga nisbatan oʻrtacha 0,4 foizga qimmatlashgan.
Maʻlumot oʻrnida, mamlakatda soʻnggi 10 oy ichida 773 dona, oktyabr oyida 77 dona avtobus ishlab chiqarilgan.
Shuningdek, joriy yilning yanvar-oktyabr oylarida Oʻzbekistonga qiymati 110,2 mln AQSh dollariga teng boʻlgan 300 mln litrdan ziyod avtomobil benzini import qilingan.
Bundan tashqari, joriy yilning noyabr oyida benzin 9,8 foizga qimmatlashgan. Propan esa aksincha, oy davomida respublika boʻyicha oʻrtacha 7,2 foizga arzonlashgan, metan narxi   oʻzgarishsiz qolgan.