2024-2025 o'quv yilidan tajriba-sinov sifatida Nizomiy nomidagi Toshkent davlat pedagogika universitetiga ikki bosqichli imtihon o'tkaziladi.

Bu haqda TDPU o'quv ishlari bo'yicha prorektori Hayot Qodirov ma'lum qildi:
 Keltirilishicha, 2024/2025 o'quv yilidan boshlab tajriba-sinov tariqasida universitetning pedagogika ta'lim yo'nalishlariga (alohida iqtidor talab etiladigan ta'lim yo'nalishlari bundan mustasno) qabul jarayonlari ikki bosqichda, jumladan:
 
birinchi bosqichda — dastlabki imtihon shaklida,
 
ikkinchi bosqichda — kirish test sinovlari orqali amalga oshiriladi.
 
Bunda:
 
dastlabki imtihon va kirish test sinovlari Davlat test markazi tomonidan o'tkaziladi;
 
dastlabki imtihon doirasida abiturientlarning pedagogik kasbga moyilligi o'rganiladi;
 
kirish test sinovlarida qatnashishga faqat dastlabki imtihondan muvaffaqiyatli o'tgan abiturientlargagina ruxsat etiladi.
 
SHuningdek, 2024 yil 1 yanvarga qadar TDPUning pedagogika ta'lim yo'nalishlariga o'qishga qabul qilish bo'yicha vaqtinchalik tartibni ishlab chiqish hamda tajriba-sinov natijalaridan kelib chiqib, pedagogika ta'lim yo'nalishlariga qabul imtihonlarini ikki bosqichda o'tkazish tartibini pedagog kadrlar tayyorlovchi boshqa oliy ta'lim muassasalariga ham tatbiq etish belgilangan.
 
— YAna bir yangilik bor. Hammamiz bilamizki, barcha oliy ta'lim muassasalarida qo'shma dasturlar bor. Aynan shu qarorlarda belgilab ketilganki, pedagogika sohasi qo'shma dasturlarida tahsil olayotgan 3-4-bosqich iqtidorli talabalarning shartnoma puli davlat byudjeti tomonidan qoplab beriladi, — dedi Hayot Qodirov.
 
Xabarga ko'ra, Prezident qarorida umumta'lim maktablarida pedagogika sinflarini tashkil etilishi ham keltirib o'tilgan.