Yashnaobodda haydovchilar o'rtasida mushtlashuv sodir bo'ldi

Ijtimoiy tarmoqlarda Cobalt va Lacetti avtomashinalarining toʻqnashuvi oqibatida, yoʻl harakati qatnashchilari oʻrtasidagi mushtlashuv aks etgan video tarqaldi. Mazkur holat yuzasidan Toshkent shahar IIBB quyidagilarni maʼlum qiladi.
Joriy yilning 1-sentyabr kuni soat taxminan 15:45 da, Cobalt rusumli avtomashina haydovchisi 34 yoshli B.N. va Lacetti rusumli avtomashina haydovchisi 26 yoshli Sh.U. Toshkent shahar, Yashnobod tumani, Aviasozlar va Qorasuv koʻchalari kesishmasida mayda toʻqnashuv sodir etishgan. Toʻqnashuv tufayli, yoʻl harakati qatnashchilari oʻrtasidagi janjal mushtlashuvga aylanib ketgan. Natijada Cobalt avtomashinasining yoʻlovchisi 36 yoshli B.N. tan-jarohatlari olib shifoxonaga murojaat qilgan.
Hozirda holat yuzasidan Yashnobod tumani IIO FMB tomonidan tergovga qadar tekshiruv oʻtkazilmoqda, uning natijalariga koʻra qonuniy qaror qabul qilinadi.