Rossiya Oʻzbekiston “Sputnik V” vaksinasini ishlab chiqarishni yoʻlga qoʻyadigan kompaniyani tanlashini kutmoqda

Rossiya hozircha Oʻzbekiston mamlakatda “Sputnik V” vaksinasini ishlab chiqarish bilan shugʻullanadigan kompaniyani tanlashini kutmoqda. Bu haqda Rossiya tashqi ishlar vaziri oʻrinbosari Andrey Rudenko maʼlum qildi.

Rudenkoning soʻzlariga koʻra, Oʻzbekiston va MDHdagi boshqa davlatlar uchun vaksina “eng jozibali shartlarda” yetkazib beriladi.

“Markaziy Osiyodagi sheriklarimiz tomonidan Rossiya vaksinasiga boʻlgan katta qiziqishni kuzatmoqdamiz. ʻSpunik Vʻ va ʻEpiVakKoronaʻ dori vositalari mintaqadagi mamlakatlarda sertifikatsiya jarayonlaridan oʻtmoqda. Turkmanistonda u toʻliq yakunlandi. Qozogʻiston va Oʻzbekiston ʻSputnik Vʻ vaksinasini ishlab chiqarishni, jumladan, tegishli texnologiyalarni uzatishni tashkillashtirishda yordam koʻrsatmoqda”, — deydi u.

Rudenkoning qoʻshimcha qilishicha, Rossiya “Oʻzbekiston tomoni malakali texnologik sherikni aniqlashini kutmoqda”.

“Butun dunyoda koronavirus infeksiyasining yuqori tezlikda tarqalishi davom etayotganini hisobga olgan holda, biz sheriklarimizning ehtiyojini qondirish uchun maksimal darajada harakat qilamiz”, — deya taʼkidlaydi vazir oʻrinbosari.

Eslatib oʻtamiz, Oʻzbekistonda ayni vaqtda Xitoyning Anhui Zhifei Loncom Biofarmaceutical kompaniyasi tomonidan yaratilgan ZF 2001 rekombinant vaksinasining sinovlari davom etmoqda. Shuningdek, Rossiyaning “Sputnik V” vaksinasini Oʻzbekistonda ishlab chiqarishni mahalliylashtirish rejasi ham mavjud. Umuman, Oʻzbekistonda koronavirusga qarshi vaksinalar ishlab chiqarishni yoʻlga qoʻyish rejalashtirilayotgani haqida 2020-yilning noyabrida maʼlum boʻlgandi, deb xabar beradi daryo.uz.

Foto: Vedemecum