Okeanda ikki yil “suzgan” maktub

Tabiatni muhofaza qiluvchi Stiven Amos noyabr oyida Papua Yangi  Gvineya orollari zanjirining  ajralmas qismi bo‘lgan Panases orolida qirg‘oq tozalayotgan bir paytda shishaga qoqilib ketadi. Uning ichida bir hovuch guruch, bir nechta chig‘anoqlar va maktub bor edi. 
The Guardian nashrining xabar berishicha, shisha 17 yoshli amerikalik Niki Nayga tegishli bo‘lib, u 2019 yil 9 yanvarda oilasi bilan Qo‘shma Shtatlarga qaytayotganida, ya’ni Vanuatu va Marshal orollari o‘rtasidan suzib o‘tib, ekvatorni kesib o‘tayotgan paytda dengizga tashlangan. Shisha 2500 kilometrdan ko‘proq masofani bosib o‘tib, Panases  orollariga yetib bordi. “Agar siz ushbu maktubni o‘qiyotgan bo‘lsangiz, demak, shisha uzoq yo‘lni bosib o‘tgan va sizning qo‘lingizga kelib qolgan. Shisha qayerda tugaganini va u yergacha qancha vaqt sarflanganiga juda-juda qiziqyapman”, - deb yozadi Nye maktubda. Xatda elektron pochta manzili ko‘rsatilganiga qaramay, Amos Nye bilan faqat ijtimoiy tarmoqlar orqaligina bog‘lana oldi. “Xatni o‘qib bo‘lgach, men Miss Nye bilan bog‘lanish uchun qo‘limdan kelganicha harakat qildim va hamkasbim yordamida bunga erishdim. U  bilan Zoom orqali gaplashamiz, deb aytganlarida juda ham hayajonlandim”, deydi Amos The Guardian nashriga. “Shishani  uloqtirayotgan paytimda, bir kun kelib ushbu maktubni topadigan inson bilan muloqotda bo‘lishimni tasavvur ham qilmagandim. Men shunchaki ko‘p vaqt o‘tkazgan okeanimda o‘zimdan kichikkina xotira qoldirishni istagandim, xolos”, - deydi Nay.