“Tolibon” rahbarlik lavozimlariga ayollarni tayinlaganini e’lon qildi

“Tolibon” harakati Afgʻonistonda hokimiyatni qoʻlga kiritganidan soʻng birinchi marta mamlakatda rahbarlik lavozimlariga ayollar tayinlangani haqida eʼlon qildi. Bu haqdagi tegishli bayonot Afgʻoniston muvaqqat hukumati axborot va madaniyat vaziri oʻrinbosari Zabihulloh Mujohid tomonidan eʼlon qilindi.
“Muvaqqat Vazirlar mahkamasi rahbarining farmoyishiga bilan doktor Malalay Rahim butun mamlakatdagi yagona akusherlik va ginekologiya muassasasi boʻlgan “Malalay” ixtisoslashtirilgan tugʻruqxonasi direktori etib tayinlandi. Oliy taʼlim vazirligi taklifi va muvaqqat hukumatdagi bosh vazirning roziligi bilan doktor Arian “Shahror” ginekologiya klinikasi direktori etib tayinlandi”, deyiladi xabarda.
Ushbu tayinlovlar oldidan “Tolibon” harakati aʼzolari qator davlatlar va xalqaro tashkilotlar vakillari bilan koʻplab uchrashuvlari boʻlib oʻtdi. Ularda xotin-qizlarning mamlakat ijtimoiy-siyosiy hayotidagi ishtiroki masalasi koʻtarildi.
Kobuldagi Abu Ali ibn Sino nomidagi Tibbiyot fanlari universiteti qoshidagi “Malalay” milliy ixtisoslashtirilgan tugʻruqxonasi va “Shahror” ginekologiya klinikasi onalar oʻlimi oʻtkir muammo boʻlgan Afgʻonistonda shu yoʻnalishdagi eng yaxshi muassasalar hisoblanadi.
Xalqaro hamjamiyatning faol qoʻllab-quvvatlashi tufayli, BMT maʼlumotlariga koʻra, soʻnggi 20 yil ichida Afgʻonistonda chaqaloqlar oʻrtasida oʻlim (har 100 ming tugʻilgan chaqaloqqa) 2000-yildagi 1450 tadan 2019-yilda 638 tagacha kamaydi. Shunga qaramay, bu dunyodagi eng yuqori koʻrsatkichlardan biri hisoblanadi.