Turkmaniston prezidenti oʻgʻlini Bosh vazir oʻrinbosari etib tayinladi

Turkmaniston prezidenti Gurbanguli Berdimuhamedov oʻgʻli Serdar Berdimuhamedovni sanoat va qurilish ishlab chiqarish vaziri lavozimidan ozod qilib, bosh vazir oʻrinbosari etib tayinladi, deb xabar berdi ORIENT axborot agentligi.

Mamlakat prezidenti hukumat tarkibiga Vazirlar Mahkamasi raisining yana bir rais oʻrinbosari lavozimini joriy qildi va uni Davlat xavfsizlik kengashiga kiritib, Oliy nazorat palatasi raisi etib tayinladi. Bu lavozimga Serdar Berdimuhamedov tayinlandi.

Bosh vazirning yangi oʻrinbosari, shuningdek, davlat boshqaruvi tizimida, moliya-iqtisodiy sektorda va ijtimoiy sohada raqamlashtirish va innovatsion texnologiyalarni joriy qilish uchun javobgar boʻladi.

Prezidentning yangi lavozim maqomi toʻgʻrisidagi farmoniga binoan Vazirlar Mahkamasida Nazorat boʻlimi tashkil etiladi, deb yozadi xabar.uz.