XKSga ilk sayyohlar Ilon Maskning kemasida 2022-yilda uchib ketadi

Foto: NASA

Xalqaro kosmik stansiya(XKS)ga ilk sayyohlar Ilon Maskning SpaceX kompaniyasiga qarashli Crew Dragon boshqariluvchi kemasida eng ertasi 2022-yilning yanvarida uchib ketadi, deya xabar berdi kosmik sayyohlikni tashkillashtirishni rejalashtirayotgan Axiom Space kompaniyasi maʼlumotiga tayanib “Interfaks”.

Avvalroq kompaniya veb-saytida sayyohlarning roʻyxati eʼlon qilingandi. Roʻyxatga koʻra, stansiyaga AQSH, Kanada va Isroil ishbilarmonlari - Larri Konnor, Mark Pati hamda Eytan Stibbe boradi. NASA sobiq astronavti Maykl Lopes-Alegria ularga hamrohlik qiladi.

XKSga 8 kunlik tashrif qiymati 55 million dollarga baholanmoqda. Parvoz oldidan sayyohlar Yerda 15 haftalik mashgʻulotlardan oʻtishi kerak. Kelajakda kosmik sayyohlar bilan parvozlarni yiliga 2-3marta amalga oshirish rejalashtirilgan.

Avvalroq SpaceX kompaniyasi Falcon eltuvchi raketasini 143 ta sunʼiy yoʻldosh bilan birga uchirib, bitta raketada uchirilgan sunʼiy yoʻldoshlar soni boʻyicha yangi jahon rekordini oʻrnatgani haqida xabar berilgandi.

Kelgusida SpaceX kompaniyasi Yer aholisini sayyoraning istalgan nuqtasida keng polosali internetga kirish bilan taʼminlash imkoniyatini beruvchi toʻliq koʻlamli tarmoq yaratish uchun 12 mingta ushbu turdagi kosmik qurilmadan iborat orbital guruhni shakllantirishni rejalashtirmoqda. Loyihani amalga oshirishga kiritilgan investitsiyalarning umumiy qiymati 10 milliard dollarga baholanmoqda, deb xabar beradi daryo.uz.