“Hali xursand emasman!” - Shavkat Mirziyoyev

Oʻzbekistonda 5 yil oldin oliy taʼlimga qamrov 9 foiz edi, hozir bu koʻrsatkich 29 foizga chiqdi. Bu haqda prezident Shavkat Mirziyoyev Koʻksaroy qarorgohida boʻlib oʻtayotgan tadbirda maʼlum qildi.
“5 yil oldin oliy taʼlim bilan qamrovimiz 9 foiz edi, hozir 29 foizga chiqdik. Shundan xursandmisiz, desangiz aytaman – yoʻq, hali xursand emasman. 50 foizgacha chiqarsak koʻnglim toʻladi. Olimlari, xalqi bilimli boʻlgan davlat baribir kuchli boʻladi. Men bunga ishonaman. Taʼlim va yana taʼlim, deb bekorga aytmayman. Maktabgacha taʼlim vazirligi faoliyatini ham bejiz yoʻlga qoʻymadik.
Navoiyda koʻrdingiz, bilimli odam bemalol oʻz yoʻlini topyapti. Ikki yil avval Marhamatda IT-Park ochganimizda koʻpchilik kulgandi. Hozir oʻsha parkdagi yigit-qizlar oyiga 3-4 ming dollargacha maosh olishyapti.
Yaqinda tadbirkorlar bilan uchrashdim. Shunda koʻrdingiz, bir yigit agar imkoniyati bersangiz 100 ming kishini IT sohasida ish bilan taʼminlayman, dedi. Umuman tadbirkorlardan 15 mingdan ortiq taklif tushdi, imkon qadar oʻzim oʻrganib chiqdim. 70 foizi adolatli gaplar. Endi ularning yechimi ustida ishlaymiz”, dedi davlat rahbari rasmiy nutq boshlanishi oldidan.