9,1 milliard soʻmlik noqonuniy tovarlar ushlandi

Toshkentdagi bojxona postidan umumiy qiymati 9,1 milliard soʻm boʻlgan tovarlarni noqonuniy olib oʻtmoqchi boʻlganlar ushlandi. Bu haqida Oʻzbekiston Respubikasi Bojxona qoʻmitasi Matbuot xizmati xabar bermoqda. 
Qayd etilishicha, Toshkentdagi “Chuqursoy” bojxona postida MCHJlardan birining nomiga xorijdan temir yoʻl konteynerida keltirilgan yuklar bojxona koʻrigidan oʻtkazilgan. 
Aniqlanishicha, konteynerdagi yuklar orasida yoʻl-yuk kuzatuv hujjatlarida qayd etilmagan umumiy qiymati 9,1 milliard soʻm boʻlgan 5 ming 300 dona soyabonlar, 251 mingdan ziyod fonar, 3,5 mln dona bolalar uchun sharlar hamda 10 ming 900 dona chiroqlar borligi aniqlangan.
Dastlabki hisob-kitoblarga koʻra, ularni bojxona nazoratidan yashirincha olib kirish orqali yuk egalari davlat byudjetiga undirilishi lozim boʻlgan 2,8 milliard soʻmlik bojxona toʻlovlarini “tejamoqchi” boʻlishgan.
Hozirda mazkur holat yuzasidan surishtiruv ishlari olib borilmoqda.