Hayvonlarga nisbatan shafqatsiz munosabatda boʻlgan shaxslar 6 oygacha ozodlikdan mahrum qilinishi mumkin

27-yanvar kuni Oʻzbekiston Respublikasi Oliy Majlis Qonunchilik Palatasi deputatlari tomonidan birinchi oʻqishda “Oʻzbekiston Respublikasining Jinoyat kodeksiga hamda Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartish va qoʻshimchalar kiritish haqida”gi Oʻzbekiston Respublikasi Qonuni loyihasi  koʻrib chiqildi.

 Unga koʻra  Jinoyat kodeksning Hayvonlarga nisbatan shafqatsiz munosabatda boʻlish deb nomlangan 2021-moddasiga quyidagi oʻzgartirishlar  kiritish koʻzda tutilgan:

 Hayvonlarga nisbatan shafqatsiz munosabatda boʻlish, yaʼni bezorilik oqibatida yoki boshqa gʻarazli niyatlarda ularni qiynoqqa solish yoxud ularga azob yetkazish ularning oʻlimiga yoki mayib boʻlishiga olib kelsa, shunday harakatlar uchun maʼmuriy jazo qoʻllanilganidan keyin sodir etilgan boʻlsa,- bazaviy hisoblash miqdorining yigirma besh baravaridan ellik baravarigacha miqdorda jarima yoki ikki yuz qirq soatgacha majburiy jamoat ishlari yoxud bir yilgacha axloq tuzatish ishlari yoxud olti oygacha ozodlikni cheklash yoki olti oygacha ozodlikdan mahrum qilish bilan jazolanadi.

 Qonun loyihasini “ Mehr va oqibat” NNT  Bosh prokuraturaga 2020-yilning fevral oyida taqdim etgan edi. Nihoyat gʻisht qolipdan koʻchdi

 Qonun loyihasini qabul qilish uchun yana 2 ta oʻqish bor. Deputatlarga bu borada omad tilaymiz. Zero, tabiatga, hayvonlarga nisbatan vahshiyona munosabatda boʻlganlarni  jazolash, bunday huquqbuzarliklarni oldini olish bilangina biz jahon hamjamiyatida oʻzimizning munosib oʻrnimizga ega boʻlishimiz mumkin.  Oʻzbekistonning tashqi imiji ham koʻp jihatdan ekologiya muammolari qay darajada yechilayotgani bilan bogʻliq deb xabar beradi ekologuz