Oʻzbekistonda 2024-yilgacha maktab oʻqituvchilarining oyligi ming dollarga yetadi

 Xalq taʼlimi vazirligi 2024-yilgacha maktab oʻqituvchilarining oyligini ming dollarga yetkazishni rejalashtirgan. Bu haqda vazir oʻrinbosari Temur Komilov maʼlum qildi.

“Prezidentimizning topshirigʻiga koʻra, oʻqituvchilarning oyligini 2024-yilgacha xalqona tilda aytganda ming dollarga yetkazishni moʻljallaganmiz va bu masalada takliflar tayyorlanmoqda.

Qaror loyihasi ishlab chiqilgach, uni albatta, jamoatchilik, xususan, oʻqituvchi-ustozlarimiz bilan muhokama qilamiz”, – dedi Komilov 1-fevral kungi matbuot anjumanida.

 Temur Komilov xalq taʼlimi tizimidagi moliyaviy qingʻirliklarga izoh berarkan, ular, asosan, naqd puldan oʻgʻirlash, ishlanmagan soatlarga qoʻshib yozish, lavozim maoshlarini notoʻgʻri qoʻllash - mutaxassisga oliy toifali oʻqituvchining stavkasida maosh belgilash, malaka-toifa sertifikatlarini qalbakilashtirib, asossiz va noqonuniy maosh qoʻshib yozish koʻrinishida amalga oshirilganini aytdi, deb xabar beradi human.uz.