Namanganda ilk bor tashkil etilgan dron shou

Namanganda bayramona dron shou boʻlib oʻtdi. Viloyat hokimligi va Kadastr agentligining “Geoinnovatsiya markazi” hamkorligida Namanganda ilk bor tashkil etilgan tomoshada 500 ta dron uchirildi.

Ular yordamida 8 ta shakl hosil qilindi. Humo qushi, tuyalar karvoni, tarixiy obidalar, donishmand qariya timsollari shular jumlasidan.

Belgilangan vaqtdan uch soat oʻtib, 21:50 atrofida boshlangan shou 12 daqiqa davom etdi. Uni Namangan shahridagi “Afsonalar vodiysi” bogʻiga toʻplangan koʻplab tomoshabinlar bevosita kuzatib bordi, mahalliy televideniye orqali toʻgʻridan-toʻgʻri efirda olib koʻrsatildi.

“Geoinnovatsiya markazi” davlat unitar korxonasi direktor oʻrinbosari Qudrat Qulimbetovga koʻra, ob-havo sharoiti tadbir uchun biroz noqulay boʻlishiga qaramay, birorta dron yoʻqotilmadi va qurilmalarga shikast yetmadi.

Bu haqda “Daryo” muxbiri Azizbek Abduvaliyev xabar bermoqda, deb yozadi daryo.uz.

Foto: Namangan viloyati hokimligi axborot xizmati