Namanganda masjidni tunamoqchi boʻlgan uddaburon oʻgʻri qoʻlga tushdi

Joriy yilning 2-fevral kuni Namangan shahrida yashovchi fuqaro shu kuni soat 13:00 da Namangan shahar “Chorsu” dehqon bozorida joylashgan hojatxonada egnida boʻlgan kurtkasini qarovsiz qoldirganligidan foydalangan nomaʼlum shaxs, kurtkaning choʻntagidan narxi 160 AQSH dollari boʻlgan “Iphone 6S” rusumli uyali telefon apparatini oʻgʻrilab ketganligini maʼlum qilib, chora koʻrishni soʻrab ariza bilan murojaat qilgan.

Namangan shahar IIO FMB 4-sonli JQB katta tezkor vakili tomonidan olib borilgan tezkor-qidiruv va surishtiruv harakatlari natijasida, ushbu jinoyatni Toʻraqoʻrgʻon tumanida yashovchi, 1981-yilda tugʻilgan fuqaro sodir etganligi aniqlangan.

Surishtiruv ishlari davomida ushbu shaxs jinoiy harakatlarini davom ettirib, Namangan shahar Chorsu MFY hududida joylashgan “Xoʻja Amin” jome masjidiga namoz oʻqish uchun kelgan, Namangan shahrida yashovchi, 1988-yilda tugʻilgan fuqaroga tegishli boʻlgan narxi 600.000 soʻmlik erkaklar qishki oyoq kiyimini oʻgʻrilab ketganligi ham aniqlangan , deyiladi Namangan viloyat IIB Axborot xizmati xabarida.