Nogiron erkakning uyida oʻgʻrilik sodir etildi. Ularga sud hukmi oʻqildi

Buxoro viloyati Ichki ishlar boshqarmasi axborot xizmatining xabar berishicha,Gʻijduvon tumanida 29-dekabr kuni nogironligi bor erkakning uyiga yigitlar bostirib kirib, oʻgʻrilik qilgan. Ularga sud hukmi oʻqildi. 
Maʼlum boʻlishicha, voqea 28-dekabrdan 29-dekabrga oʻtar kechasi tumanning Sharq mahallasi hududida sodir boʻlgan. Aniqlanishicha, gʻijduvonlik 24 yoshli A. va Sh., 25 yoshli R., 23 yoshli M. hamda 19 yoshli M. ismli yigitlar “boy aka” nomi bilan tanilgan nogironligi bor tadbirkor S.S.ning xonadoniga bostirib kirgan.
Taʼkidlanishicha, ular xonadon egasini qoʻrqitish uchun pichoq bilan qurollanib, qora rangli futbolka bilan niqoblangan. Mazkur bosqinchilikda ular mashina yukxonasida boʻlgan 12,5 million soʻm pul va ikki dona telefon apparatini olib, yoʻl chetida kutib turgan “Damas”da voqea joyidan yashiringan.
Sud tomonidan A. Jinoyat kodeksining 164-moddasi (Bosqinchilik) 3-qismi bilan aybdor deb topilib, 13 yil muddatga ozodlikdan mahrum qilingan. Shu modda bilan ayblanuvchi Sh. 12 yil muddatga, R. va M. 11 yilga ozodlikdan mahrum qilingan. Shuningdek, fuqaro M.ga ushbu kodeksning 241-moddasi (Jinoyat haqida xabar bermaslik yoki uni yashirish) 1-qismida nazarda tutilgan jinoyatni sodir etganlikda aybdor deb topilib, 3 yil muddatga ozodlikni cheklash jazosi tayinlangan.