Qirgʻizistonda hukumat iste’foga chiqarildi

Qirgʻiziston Respublikasi Prezidenti Sadir Japarov mamlakat hukumatini isteʻfoga chiqardi. Ammo amaldagi hukumat tarkibi yangi Vazirlar Mahkamasi shakllantirilguncha ishini davom ettiradi.
Shu bilan birga Prezident Oqilbek Japarovni Qirgʻiziston Bosh vaziri vazifasini bajaruvchi etib tayinladi. U bu lavozimda Ulugʻbek Maripovning oʻrnini egalladi.
Bu oʻzgarishlar kecha Sadir Japarov imzolagan Vazirlar Mahkamasining maqomi toʻgʻrisidagi qonunning kuchga kirishi bilan bogʻliq.
Hujjatga koʻra, Bosh vazir bir vaqtning oʻzida Prezident Administrasiyasining ham rahbari boʻladi. Davlat rahbari esa oʻz xohishiga koʻra yoki parlament va Xalq qurultoyi fikrini inobatga olib, istalgan vazirni ishdan olishi mumkin.