Si Szinpin yangi sovuq urush boshlanishi mumkinligi haqida ogohlantirdi

Xitoy raisi Si Szinpin onlayn tarzda oʻtkazilgan Davoss xalqaro iqtisodiy forumida davlatlar COVID-19 koronavirusiga qarshi kurashda birlashib harakat qilishi lozimligi va yangi sovuq urushni boshlashga intilmasligi kerakligini bildirdi. Uning soʻzlariga koʻra, davlatlarning frontlarga boʻlinishi vaziyatni boshi berk koʻchaga olib kelishi mumkin.

“Kichik guruhlarni tuzish yoki boshqalarni choʻchitish va ularga tahdid qilish uchun yangidan sovuq urushni boshlash dunyoning boʻlinishiga olib keladi”,— deya Si Szinpin soʻzlaridan iqtibos keltirgan AFP.

Xitoy rahbari bir necha oy avval BMT Bosh assambleyasining 75-sessiyasida mamlakatning hech kim bilan na issiq va na sovuq urushda qatnashish niyati yoʻqligini bildirgandi.

Shuningdek, u oʻshanda BMTning pandemiyadan qiynalayotgan davlatlarga yordam koʻrsatish boʻyicha rejasini qoʻllab-quvvatlab, uning ijrosi uchun 50 million AQSH dollari ajratilishini maʼlum qilgan, deb xabar beradi daryo.uz.

Foto: France 24