Tanzaniyada oʻlimga olib keluvchi yangi virus haqida maʼlum qilindi

Afrikadagi yangi virus allaqachon 15 kishining hayotiga zomin boʻlgan. Bu haqda “Satira” xabar berdi.
Xabarga koʻra, Tanzaniyaning janubi-gʻarbiy qismidagi Mbeya hududida yangi kasallik avj olgan. Ushbu yuqumli kasallik haqida maʼlumotlar koʻp emas.
“Kasallik hali keng tarqalmagan. Faqat bitta maʼmuriy hududda roʻy bergan. Odamlar qon qusgan va kasalxonaga kech yotqizilgan vaqtda vafot etishgan”, – deydi Mbeya viloyatining Chunya tumani bosh shifokori Felista Kisandu.
Taʼkidlanishicha, 15 kishi ushbu kasallikdan vafot etgan. 50 nafari ogʻir ahvolda. Yuqtirganlarning aniq soni nomaʼlum. Dastlabki soʻrov shuni koʻrsatdiki, bemorlar, asosan erkaklar, oshqozon yarasi va jigar kasalliklariga chalingan. Shifokorlar kasallikni yuqtirganlarning tahlillarini oʻrganib, kasallikning kelib chiqishini aniqlashga urinishmoqda.
Qayd etilishicha, yangi infeksiya haqida maʼlumot tarqalgandan soʻng shifokor Felista Kisandu Sogʻliqni saqlash toʻgʻrisidagi qonunni buzganligi uchun ishdan chetlatilgan.
“Aholi oʻrtasida keraksiz vahima qoʻzgʻatgani uchun, men doktor Felista Kisandani ishdan olishni, unga qarshi tergov boshlashni va 10 kun ichida hisobot tayyorlashni buyuraman”, – deydi xabarda Tanzaniya Sogʻliqni saqlash vaziri Doroti Gvajima.
Foto: bloomberg.com