Inson hayotiga zomin bo‘lgan kiberhujum: bir necha odamni hayotdan olib ketdi: sharmandalikka dosh berolmay, o‘z joniga qasd qilganlar ham kuzatildi.

Bugungu kunda jahon o‘rgimchak to‘rida aksariyat foydalanuvchilari oilali erkaklar va ayollar bo‘lgan yuzlab tanishuv saytlari mavjud. Shunday saytlardan eng mashhuri bo‘lgan Ashley Madison tanishuv tarmog‘i ham ustasi farang xakerlarning “elagidan o‘tishiga” to‘g‘ri keldi. Kiberhujum 2015-yilda sodir etilgan, o‘sha vaqtgacha saytda 40 millionga yaqin odam foydalanuvchi sifatida ro‘yxatdan o‘tgan edi. Yahoo yoki LinkedIn oldida bu ko‘rsatkich hech nima emas, ammo kiberhujumning ta’siri juda dahshatli edi. 

Dastlab ma’lumotlar bazasiga kirish huquqini qo‘lga kiritgan xakerlar keyinchalik shantaj qilish uchun foydalanuvchilarning elektron pochta manzillarini qo‘lga kiritishgan.

O‘shanda hamma narsa ostin-ustun bo‘lib ketdi. Ko‘plab foydalanuvchilar “Turmush o‘rtog‘ingizni aldab kim bilan va qayerda unga xiyonat qilayotganingiz haqida hamma narsani bilaman. Agar hoziroq 1000 dollar bermasangiz, hammasi e’lon qilinadi” kabi mazmundagi xatlarni olishdi. Hattoki, saytda taniqli amaldorlar va ishbilarmonlar ham aniqlanib, ularga, tabiiyki, ancha katta miqdordagi pul aytilgan. Ushbu mojaro tufayli buzilgan nikohlar sonini hech kim hisoblamagan, ammo ularning ancha bo‘lganligi aniq o‘nlab, yuzlab va ehtimol minglab oilalar bir zumda buzilib ketgan.

Balki, oʻsha juftliklar baribir ajrashgan bo‘lar edi, ammo ushbu sharmandali holat odamlarni amaliy harakatga unday oldi. Eng yomoni, kiberhujum bir necha odamni hayotdan olib ketdi: sharmandalikka dosh berolmay, o‘z joniga qasd qilganlar ham kuzatildi.

Shunday bo‘lsa ham, Ashley Madison bugungi kungacha o‘z faoliyatini davom ettirib kelmoqda. Bu esa talab hanuzgacha mavjudligini, odamlar tarixdan hech qanday saboq olmaganligini ko‘rsatadi.