O‘zbekistonda kasb-hunar bo‘yicha maxsus kursni tugatgan ishsiz yoshlarning o‘qish xarajatlarini davlat qoplab beradi

Xabarga ko‘ra, yoshlarni tadbirkorlikka yo‘naltirish va ularning biznes loyihalarini qo‘llab-quvvatlash maqsadida Savdo-sanoat palatasi va hamkor tashkilotlar tomonidan yoshlarga tadbirkorlik haqida nazariy bilimlar beriladi. “Yoshlar 1+1” dasturi asosida 6 kun davomida maxsus kurslar tashkil etilib, kurs tinglovchilariga maxsus sertifikatlar berilishi rejalashtirilmoqda. Kurslarni tugatgan ishsiz yoshlar 3 yil muddatga 33 million so‘mgacha bo‘lgan 6 oylik imtiyozli davri va garovsiz kredit olish imkoniyatiga ega bo‘ladi.

Shuningdek, hududlarda “Har bir tadbirkor – yoshlarga madadkor” tamoyili asosida yoshlarni tadbirkorlikka keng jalb etish va ularning bandligini ta’minlash maqsadida namunaviy o‘qishlar tashkil etilmoqda.

Tadbirkorlikni rivojlantirish agentligi hamda Biznes va tadbirkorlik oliy maktabi tomonidan ma’qullangan dasturlar va belgilangan talablar asosida tashkil etilgan o‘quv kurslarini tamomlagan har bir bitiruvchi uchun kasb-hunar va tadbirkorlikka o‘qitish bo‘yicha nodavlat ta’lim muassasalariga sarflangan xarajatning 70 foizi, biroq har bir bitiruvchiga 1 million so‘mdan ortiq bo‘lmagan miqdori davlat tomonidan kompensatsiya qilinadi.