100 yoshdan oshgan keksalar nafaqasi oshiriladi

100 yosh va undan katta oʻzbekistonlik fuqarolar qoʻshimcha pensiya toʻlovlarini olishni boshlaydi.
Maʼlumotlarga koʻra, fuqarolar eng kam bazaviy miqdorning (289 000 soʻm) 100 foizi miqdorida pensiyaga qoʻshimcha toʻlanadi.
Qayd etilishicha, qoʻshimcha toʻlov Oʻzbekiston fuqarolari, respublikada yashovchi chet el fuqarolari va fuqaroligi boʻlmagan shaxslarga toʻlanadigan pensiyaga qoʻshimcha ravishda belgilanadi.
Eng kam pensiya miqdori oʻzgartirilganda, qoʻshimcha toʻlov mutanosib ravishda oʻzgaradi. Toʻlov pensiya qoʻshimchalarining soni va hajmidan qatʼiy nazar amalga oshiriladi.
Mablagʻlar doimiy yashash joyida yoki vaqtincha roʻyxatdan oʻtgan joyida toʻlanadi.
Shuningdek, chet el fuqarosi yoki fuqaroligi boʻlmagan shaxsga yashash uchun ruxsatnoma yoki shaxsiy guvohnoma amal qilish muddati davomida toʻlanadi.
Fuqaroning vafoti munosabati bilan olinmagan nafaqani toʻlash “Fuqarolarning davlat pensiya taʼminoti toʻgʻrisida”gi Qonunning 63-moddasida belgilangan tartibda amalga oshiriladi.