DXX: “Islom Davlati” terroristik tashkiloti a’zosi Oʻzbekistonga olib kelindi

1969-yil Xiva shahrida tugʻilgan fuqaro “D.U.” oʻgʻli - 1994-yilda tugʻilgan “D.X.” bilan birgalikda 2009-2015-yillarda Rossiya Federatsiyasida mehnat migranti sifatida ishlashi davrida ijtimoiy tarmoqlar orqali xalqaro terroristik tashkilotlar a’zolarining ta’siriga tushib qoladi. 
Natijada, 2015-yilning sentabr oyida ota-bola oʻzlarining shaxsini oshkor qilmaslik maqsadida Tojikiston Respublikasining soxta pasportini rasmiylashtirib, Turkiya orqali Suriya davlatiga borishadi hamda «Islom Davlati» xalqaro terroristik tashkiloti a’zolari safiga qoʻshilib, jangovor harakatlarda ishtirok etishadi.
Keyinroq “D.U.” Suriyadan MDH davlatlaridan biriga qoʻporuvchilik harakatlarini amalga oshirish maqsadida qaytib keladi. DXX xodimlarining xorijiy hamkorlar bilan birgalikda olib borgan tezkor-qidiruv tadbirlari natijasida “D.U.” ushlanib, Oʻzbekistonga olib kelindi.
Ta’kidlash lozimki, qoʻlga olish vaqtida “D.U.” faol qarshilik koʻrsatgan boʻlsa, keyingi jarayonlarda u oʻzining “jihod” qilish borasidagi qarashlaridan voz kechmaganligini bildirgan.
Hozirda “D.U.”ga nisbatan Jinoyat Kodeksining tegishli moddalari bilan qoʻzgʻatilgan jinoyat ishi doirasida tergov harakatlari olib borilmoqda. Shuningdek, “D.U.”ning oʻgʻliga nisbatan qidiruv e’lon qilingan.