Rossiyada sovuqda qolib ketgan fuqarolar Vatanga qaytarildi

Navoiy viloyatidan A.Ya Rossiya Federatsiyasining Ufa shahriga ishlash maqsadida ketgan. 2020-yil dekabr oyida ishsiz, pulsiz qoladi va vaqtinchalik yashash joyidan haydaladi. U sovuqda koʻchada qolib ketib, salomatligi yomonlashishi oqibatida tez tibbiy yordam orqali shifoxonaga olib ketiladi.
Shifokorlar tomonidan koʻrsatilgan tibbiy muolajalar natijasida fuqaroning qoʻl va oyogʻidagi barmoqlari amputatsiya qilinadi.
Shuningdek, andijonlik A.B oilasidagi moliyaviy qiyinchilik sababli Sankt-Peterburg shahriga qurilish obyektlarida ishlash maqsadida ketgan. Ish vaqtida qurilish obyektining 3-qavatidan yiqilib tushadi.
Ushbu fuqarolarga shifoxonada tibbiy yordam olinishida koʻmaklashilib, Xorijda mehnat faoliyatini amalga oshiruvchi fuqarolarni qoʻllab-quvvatlash hamda ularning huquq va manfaatlarini himoya qilish jamgʻarmasi mablagʻlari hisobidan Moskva-Samarqand hamda Sankt-Peterburg-Toshkent yoʻnalishida Oʻzbekistonga qaytarildi.
Tashqi mehnat migratsiyasi agentligi masʼul xodimlari tomonidan fuqarolar tez tibbiy yordam mobil guruhlari yordamida kutib olinib, doimiy yashash manziliga kuzatildi.
Navoiylik fuqaro A.Yaning Oʻzbekistonda yaqin qarindoshlari va doimiy yashash manzili yoʻqligi sababli Navoiy viloyati hokimligi tomonidan fuqaroni davolash-mehnat terapiyasini amalga oshirish va reabilitatsiya qilish, keyinchalik “Muruvvat” uyiga joylashtirish rejalashtirilgan.