“Afrosiyob” tezyurar poyezdiga tosh otgan bezori aniqlandi

Joriy yilning, 18-yanvar kuni soat 16:48da “Ziyovuddin-Zirabuloq” temir yoʻl bekatlari oraligʻi 3819 km.da, “Buxoro-Toshkent” yoʻnalishidagi “Afrosiyob” yuqori tezyurar yoʻlovchi poyezdi yoʻnalishi boʻylab oʻng tomondan 5-vagon 1-oynasiga nomaʼlum shaxs tomonidan tosh otib sindirilgani aniqlandi. 
Shu yilning 20-yanvar kuni Samarqand viloyati IIB TXTB xodimlari tomonidan  olib borilgan surishtiruv ishlari davomida, ushbu shaxs 2001-yilda tugʻilgan, Samarqand viloyati, Narpay tumani, Axillik mahallasida yashovchi  fuqaro ekanligi maʼlum boʻldi, deb maʼlum qiladi IIV Transportda xavfsizlikni taʼminlash bosh boshqarmasi.
Holat yuzasidan tergovga qadar surishtiruv ishlari davom etmoqda.