Yuridik universitet talabasi qurilish obyeʼktida vafot etdi

Toshkent davlat yuridik universitetining 3-bosqich talabasi Bahodir Bozorov oʻzi ham ishlab, ham yashayotgan, qurilishi tugallanmagan bino hududida yiqilib, vafot etdi. Bu haqda Kun.uz xabar beradi.
Talabaligining uch yilidan ehtimol bir kuni ham yengil oʻtmagan bu yigit umrining soʻnggi oylarini Bektemir tumani hokimiyatiga yaqin joydagi qurilish obyektida ham yashab, ham ishlab oʻtkazgan.
Kunduzi quloqchin taqib, onlayn darslarda qatnashgan, fevral oyidan yarim kun darsga borib, yarim kun ishlagan, kechalari qurilishi tugallanmagan binoda usta yigitlar bilan yashagan, dars qilgan. Shanba kuni tunda (2021-yil 27-fevral) lift uchun betondan tayyorlangan, himoyalanmagan shaxtaga 2-qavatdan yiqilgan. Tez yordam kelavermagach, yaqinlari koʻchadan patrul mashinasini toʻxtatib, yordam soʻrashgan. Shoshilinch yordam boʻlimida uning vafot etganini aytishgan.
Toshkent shahar sud-tibbiy ekspertizaning maʼlum qilishicha, marhum boʻyin umurtqasining sinishi, jigar yorilishi oqibatida vafot etgan.