Er rashk sababli o’z xotinini pichoqlab o’ldirdi

Namangan viloyati Norin tumanida 23-iyul kuni er 34 yoshli xotini bilan janjallashib, uni pichoqlab oʻldirdi. Bu haqda viloyat Ichki ishlar boshqarmasi axborot xizmati xabar berdi.
Maʼlum qilinishicha, soat 01:40 da erkak turmush oʻrtogʻining chevarxonasiga mast holatda borgan. U “sen nega boshqa yigitlar bilan telefonda gaplashyapsan?” deb xotini bilan janjallashgan va osh pichoq bilan ayolning oʻng bilak va chap koʻkrak sohasiga urgan. Oqibatda, u ogʻir tan jarohati olib, shifoxonada vafot etgan.
Holat boʻyicha tuman prokuraturasi tomonidan 23-iyul kuni Jinoyat kodeksining 97-moddasi (Qasddan odam oʻldirish) 1-qismi bilan jinoyat ishi qoʻzgʻatilgan.