Sergelida korxona omborida portlash sodir boʻldi

Toshkent shahar Sergeli tumanida 31-iyul kuni korxona omborida portlash sodir boʻldi. Bu haqda Favqulodda vaziyatlar vazirligi axborot xizmati xabar berdi.
Maʼlum qilinishicha, holat 31-iyul kuni soat 19:30 atrofida Sergeli tumanida joylashgan Qushqoʻrgʻon mahallasida sodir boʻlgan. Ombordan tashqari, ushbu korxonaning ofis binolari qulab tushdi va yonma-yon joylashgan doʻkon ham qisman zarar koʻrgan. Oqibatda korxona xodimi halok boʻlgan va yana uch kishi turli darajada tan jarohatlari olib, kasalxonaga yotqizilgan.
Xabarda aytilishicha, portlash xonaga gaz oqishi oqibatida kelib chiqqan. Voqea joyida ayni damda Favqulodda vaziyatlar vazirligi qutqaruvchilari, shuningdek, Ichki ishlar vazirligi, Bosh prokuratura va boshqa tegishli idoralar vakillari ishlamoqda.