Buxoroda 14 ming dollar evaziga yer sotishga uringan shaxs qoʻlga olindi

Buxoro viloyati, Shofirkon tumanida 16 sotix yer maydonini 14 ming dollar evaziga yer sotishga uringan shaxs 3000 dollar bilan qoʻlga olindi. Holat Bosh prokuratura huzuridagi Iqtisodiy jinoyatlarga qarshi kurashish departamentining Shofirkon tuman boʻlimi va DXX xodimlari tomonidan aniqlandi.  
Taʼkidlanishicha, Shofirkon tumanilik fuqaro N.X. avvaldan tanishi boʻlgan X.R.ga   Buxoro shahar hokimligi zaxirasida boʻlgan 16 sotix yer maydonini 14000 AQSH dollariga sotishga kelishgan. N.X. fuqaro X.R.dan yer maydoni uchun hujjatlashtirish ishlarini amalga oshirishi uchun oldindan 3000 dollar berishini talab qilgan. Eski tanishining hatti-harakatlaridan shubhalangan X.R. holat yuzasidan huquq-tartibot idoralariga bildirishga majbur boʻlgan. 
Bosh prokuratura huzuridagi Departamentning Shofirkon tuman boʻlimi tomonidan viloyat DXX xodimlari bilan hamkorlikda tezkor tadbir oʻtkazilgan. Tadbir davomida N.X. “kelishuvdagi” ushbu pullarni ukasi orqali olgan vaqtida ushlangan.
Mazkur holatlar yuzasidan Jinoyat kodeksining 168-moddasi (Firibgarlik) va 28-, 211-moddasi (Pora berish) bilan jinoyat ishlari qoʻzgʻatilib, tergov harakatlari oʻtkazilmoqda.