Navbahor tumanining “oltin fondi” va “qizil hudud”dan “yashil hudud”ga qanday o‘tiladi?

Prezidentimiz Shavkat Mirziyoyev har bir ma’ruzalarida ta’limni yanada rivojlantirish, yoshlarni ilmli bo‘lishlarini alohida ta’kidlaydi.

Bugungi kunda ta’limda olib borilayotgan islohotlar ham kelajak vorislari bo‘lgan yoshlarimizga keng yo‘l ochish,  ilm cho‘qqilarini egallashlariga yaratilayotgan imkoniyatdir. Xo‘sh, ilm olishda yoshlarimizga barcha imkoniyatlar ochilgan ekan, nega ta’lim muassasalari “qizil hudud”ga kirib qolgan? Undan chiqish choralari qanday belgilanyapti?

Navbahor tumanidagi 24-umumta’lim maktabi tuman markazidagi eng uzoq ta’lim dargohlaridan biridir. Jurnalistlar mazkur maktab bilan tanishar ekan, maktab direktori M. Berdiyeva maktabning oldingi holati haqida gapirib berdi:

-  Bu maktab 1960-70 yillarda bog‘cha tipida qurilgan bo‘lib, bino juda eskirib ketgan edi. Eski binodan tabiiyki inson hayoti uchun zararli bo‘lgan har xil hashoratlar yashaydi. Mana shu eski bino o‘rnida 160 o‘rinli maktab qad rostladi.

Maktab rahbari eng og‘riqli bo‘lgan muammo o‘quvchilarning oliy o‘quv yurtlariga kirish ko‘rsatkichning pastligi haqida kuyinib gapirdi:

-  O‘tgan yili maktabimizning bitiruvchilaridan 1 nafar o‘quvchi oliy o‘quv yurti talabasi bo‘ldi. Bu albatta biz uchun achinarli ahvol. Bu muammoni yechish maqsadida Navoiy pedagogika instituti bilan hamkorlikni yo‘lga qo‘ydik, o‘quvchilar orasida kitobxonlikni kuchaytirib, bilimlarini oshirish uchun kitobxonlik kechalarini o‘tkazyapmiz, fan to‘garaklari tashkil etilgan.

Maktabning yana og‘riqli tomonlaridan ta’lim dargohida sport zali hamda musiqa asboblarining yo‘qligi o‘quvchilarni sport va musiqadagi yutuqlari ro‘yobiga to‘siq bo‘layotganidir.

-  To‘g‘ri, maktabimizda sport zali va musiqa asboblari mavjud emas. Yo‘q ekan, deb qarab turolmaymiz. Maktabimizda shaxmat, shashka to‘garaklarini tashkil etganmiz. O‘quvchilarimiz yaxshi natijalarga erishyapti. Maktabning  4-sinf o‘quvchisi Asilbek Boboqulov tumanda o‘tkazilgan hududiy shaxmat musobaqasida 3-o‘rinni egalladi.

M. Berdiyeva jurnalistlarni maktab kutubxonasi bilan tanishtirar ekan, kutubxonada jami 971 ta kitob borligini ta’kidladi. Agar bir xil nusxadagi kitoblarni hisobga olsak, albatta bu kitoblar maktabdagi o‘quvchi soniga kamlik qiladi.   

Shundan so‘ng ommaviy axborot vositalari xodimlari tumandagi 4-umumta’lim maktabi faoliyati bilan tanishdi.

Mazkur maktabda ham o‘quvchilarning OTMlarga kirish reytingining pastligi, sport, musiqa darslari uchun sharoitlar yetishmasligi katta mummo ekanligi ta’kidlandi.

Maktab direktori Komiljon To‘xtayev o‘qituvchilarning ish faoliyatining natijasi past bo‘lsa, bunday o‘qituvchilarning o‘rniga bilimli, tashabbuskor, o‘quvchilarining kelajagi uchun jonkuyar o‘qituvchilarni ishga olishini alohida ta’kidladi.

Shundan so‘ng jurnalist va blogerlar tuman xalq ta’limi bo‘limida uchrashuvni davom ettirishdi. Mazkur uchrashuvga tumandagi maktablarning direktor va o‘qituvchilari, respublika va xalqaro tanlovlarga chiqqan o‘quvchilar, ularning ota-onalari ishtirok etishdi.

Tumandagi 9-umumta’lim maktabning 11-sinf o‘quvchisi Rayhona Ibragimova biologiya fani bo‘yicha Xalqaro olimpiadaga tayyorgarlik ko‘ryapti:

-  Ustozlarimga minnatdorchilik bildiraman. Ta’limdagi barcha yangiliklar biz yoshlarning kelajagi uchun yaratilayotgan imkoniyatlardir. Men kelajakda shifokor bo‘lib, yurtimga munosib farzand bo‘laman.

Tadbir so‘ngida tuman xalq ta’limi mudiri Xurshid Rahmatov Xalqaro olimpiada va viloyat tanlovlarida ishtirok etayotgan o‘quvchilarni qimmatbaho sovg‘alar bilan rag‘batlantirdi.

Tuman xalq ta’limi mudiri  X.Raxmatov bu o‘quvchilarni tumanning oltin fondlari, biz ular bilan faxrlanamiz. Bunday o‘quvchilar safini kengaytirib, tumanni ta’lim sohasidagi salohiyatini yuksaltiramiz. “Qizil hudud”dagi maktablarda ham mana shunday qobiliyatli o‘quvchilarni kashf etamiz,  har bir maktabdan kamida 10 nafar o‘quvchi oliy o‘quv yurtlariga o‘qishga kiradi, deya ta’kidladi.

Tumandagi mazkur maktablarni kuzatar ekanmiz, bu maskanda ta’lim olayotgan yoshlar naqadar ilmga chanqoqligini ko‘rish mumkin. Bu yoshlarni ilm yo‘lida o‘z maqsadlariga erishishlarida, “qizil hudud”dan “yashil hudud”ga o‘tishlarida murabbiy-o‘qituvchilardan jonkuyarlik, fidoyilik talab etiladi.