Ozon qatlamini himoyalashimiz shart(mi)?

Ozon quyoshning xavfli ultrabinafsha nurlaridan yer yuzidagi butun tiriklikni himoyalab turadi. Agar bu qatlam bo`lmasa, quyoshdan kelayotgan hamma nurlar to`g`ridan-to`g`ri tushadigan bo`lsa yer yuzida hayot allaqachon tugagan bo`lar edi. Ozon qatlami – atmosferaning tabiiy himoyasi. Ammo bu qatlam ham inson omili tufayli emirilmoqda, tuynuklar hosil bo`lmoqda.
Ozon qatlamining mavjudligi va o`z vazifasini mukammal bajara olishi erdagi hayotning davom etishida o`ta muhim rol o`ynaydi. Uning shiddat bilan yupqalashib borishi insoniyat uchun xavf solayotgan fojialar – suv tanqisligi, atmosfera ifloslanishi, cho`llanishlardan aslo kam emas. Ekologiya va atrof-muhitni muhofaza qilish davlat qo`mitasi Atmosfera havosini muhofaza qilish boshqarmasi ma’lumotlariga ko`ra, 2000-2007 yillarda O`zbekistonda GEF, YuNEP xalqaro tashkilotlar yordamida beshta loyiha amalga oshirildi. Olib borilgan barcha ishlarning samarasi o`laroq, ayni paytda yurtimizda 99,9 foiz ozonni yemiruvchi moddalar olib tashlandi va global ekologik fondning O`zbekistondagi loyihalari 142 tonna ozonni yemiruvchi moddalarni iste’moldan chiqarishga ko`mak berdi.