280 mln so’mlik noyob lochinlar

Sirdaryo viloyati bojxona boshqarmasining tezkor tuzilmalari tomonidan davlat xavfsizlik xizmati bilan hamkorlikda oʻtkazilgan tezkor tadbirda Oʻzbekiston Qizil kitobiga kiritilgan lochinlarni ona tabiatdan ajratib olib, pullashga uringan shaxslar qoʻlga olindi.
Tezkor tadbir davomida avvaldan kuzatuvga olingan shaxs boshqaruvidagi “Kamaz” yuk avtotransport vositasi “Sirdaryo” chegara bojxona postida toʻxtatilib, belgilangan tartibda koʻzdan kechirilganida, salondagi sport sumkasiga 8 bosh lochinlar yashirilgani aniqlangan. Boz ustiga qushlarga shafqatsizlarcha munosabatda boʻlingan, jonzotlar sumkaga ularning hayoti uchun xavfli tarzda zichlab joylashtirilgan.
Shu kuni tezkor tadbir Sirdaryo tumanida ham davom ettirilib, ushbu qushlarni sotib olayotgan shaxs ham qoʻlga olingan.
Surishtiruvlar davomida maʻlum boʻlishicha, qonunbuzarlar ushbu qushlarni 280 million soʻmga pullamoqchi boʻlgan.
Hozirda lochinlar Toshkent hayvonot bogʻiga vaqtincha saqlovga topshirildi va mutaxassislarning doimiy nazorati ostida parvarishlanyapti.
Holat yuzasidan esa bojxona organlari tomonidan surishtiruv harakatlari davom ettirilyapti.