Bankomatdan katta miqdorda pul oʻgʻirlandi

Toshkentda nomaʼlum shaxslar bankomatni buzib, 396 million soʻm oʻmardi. Bu haqda Toshkent shahar Ichki ishlar bosh boshqarmasi matbuot xizmati xabar berdi.
Xabarga koʻra, poytaxtning Olmazor tumanida 9-oktabrdan 10-oktabrga oʻtar kechasi nomaʼlum shaxslar banklardan birining bankomatini ochib, 396 million 300 ming soʻmni olib chiqib, gʻoyib boʻlishgan.
Shundan soʻng, mazkur holat yuzasidan Jinoyat kodeksining 169-moddasi 4-qismi (oʻgʻirlik) bilan jinoyat ishi qoʻzgʻatildi.
Koʻrilgan choralar davomida Toshkent shahar Ichki ishlar bosh boshqarmasi jinoyat qidiruv boʻlinmasi xodimlari oʻgʻirlikda gumon qilinayotgan 4 nafar shaxsni aniqlab, qoʻlga olishdi. Tergov harakatlari davom etmoqda.