Hokimlik yerini sotmoqchi bo’lganlar ushlandi

Toshkent viloyatida 6-avgust 15 gektar yerni 5 million dollarga noqonuniy sotmoqchi boʻlgan shaxslar ushlandi. Bu haqda Ichki ishlar vazirligi axborot xizmati xabar berdi. 
Maʼlum boʻlishicha, fuqaro X.S. 6-avgust kuni Toshkent viloyati Ichki ishlar bosh boshqarmasiga ariza bilan murojaat qilib, oʻzini MCHJ taʼsischilari deb tanishtirgan ikki shaxs Boʻstonliq tumani hokimi qarori bilan bogʻ barpo etish va obodonlashtirish uchun 30 yilga ijaraga berilgan 16 gektar yer maydonini 5 million dollarga sotishini aytib, oldindan 200 ming dollar talab qilganini bildirgan.
Qayd etilishicha, Davlat xavfsizlik xizmati va Iqtisodiy jinoyatlarga qarshi kurashish departamenti 6-avgust kuni tezkor tadbir oʻtkazib, fuqarolar R.G. va D.J.ni ariza muallifidan 200 ming dollarni olayotgan vaqtida ashyoviy dalillar bilan qoʻlga olgan.
Jinoyat kodeksining tegishli moddalari bilan jinoyat ishi qoʻzgʻatilib, tergov harakatlari olib borilmoqda.