2000 dollar pora talab qilganlar ushlandi

2021-yil 7-dekabr kuni IIVga J.M. ariza bilan murojaat qilib, arizada Toshkent viloyati Zangiota tumani hududidan toʻliq qurib bitkazilmagan koʻp qavatli uylardan xonadonni ipoteka krediti asosida sotib olish maqsadida “Mirokreditbank” ATB Toshkent filialiga borganida, bankning “Chakana xizmatlar” boʻlimi boshligʻi Z.Sh. uning nomiga 7 yil muddatga imtiyozli ipoteka krediti ajratib berish evaziga 2.000 AQSH dollari berishini talab qilib, pullarni uning tanishi X.Ya.ga berib qoʻyishni aytganligini maʼlum qilib, qonuniy chora koʻrishlikni soʻragan.
Mazkur arizaga asosan, shu kuni IIV JQBB Korrupsiya va iqtisodiy jinoyatlarga qarshi kurashish boshqarmasi xodimlari hamda IJQK Departamenti Toshkent viloyati boshqarmasi xodimlari hamkorligida oʻtkazilgan tezkor tadbir davomida, Toshkent shahar, Chilonzor tumani, 2-mavzesi Arnasoy koʻchasi 28-uy oldida X.Ya. ariza muallifidan 2.000 AQSH dollarini olgan vaqtda ashyoviy dalillar bilan ushlangan hamda Z.Sh. qoʻlga olinib, surishtiruvga jalb qilingan.
Mazkur holat yuzasidan Bosh prokuratura huzuridagi IJQK Departamenti Toshkent viloyati boshqarmasi tomonidan X.Ya. va Z.Sh.ga nisbatan Jinoyat kodeksining 168-moddasi va 28,211-moddasi bilan jinoyat ishi qoʻzgʻatilib, hozirda Toshkent viloyati prokuraturasi tomonidan tergov harakatlari olib borilmoqda.
IIV JQBB Korrupsiya va iqtisodiy jinoyatlarga qarshi kurashish boshqarmasi