Pora bilan qoʻlga tushdi

Kadastr agentligining Yangiyoʻl tumani boʻlimi boshligʻi vazifasini bajaruvchisi tadbirkordan pora talab qilib olayotganda ushlandi. U tadbirkordan “metan zapravka” hujjatlarini tayyorlab berishi evaziga pora talab qilgan.

Bosh prokuratura huzuridagi Departament tomonidan tadbirkorlik subyektlarining huquq va manfaatlarini himoya qilish yuzasidan oʻtkazilgan tezkor tadbirda, Kadastr agentligining Toshkent viloyati, Yangiyoʻl tuman boʻlimi boshligʻi vazifasini vaqtincha bajaruvchi S.J. “R.M.” MCHJ tomonidan qurilgan avtomobillarga gaz toʻldirish kompressor shoxobchasi binosining kadastr hujjatlarini tayyorlab berishi evaziga, jamiyat rahbaridan 10 tonna sement olib berishni talab qilib, sementni bozor narxida oʻrtacha 10 mln soʻmga hisoblab, dastlab Cobalt uchun akkumulyator hamda 500 AQSH dollarini pora tariqasida olgan vaqtida ashyoviy dalillar bilan ushlangan.

Mazkur holat yuzasidan S.J.ga nisbatan Jinoyat kodeksining 210-moddasi (pora olish) bilan jinoyat ishi qoʻzgʻatilib, tergov harakatlari oʻtkazilmoqda.