Koʻcha bezorilari ayollarni bir necha bor kaltakladi

22-yanvar kuni “YouTube”dagi “NUKUS ONLINE” kanali orqali ayol kishining bir guruh shaxslar tomonidan kaltaklangani holati aks etgan video tarqaldi. Holat yuzasidan IIV huzuridagi Tergov departamenti maʼlumot berdi.
Qayd etilishicha, 2020-yilning 16-dekabr kuni soat 08:00 da Qoraqalpogʻiston Respublikasi, Beruniy tumani A.Qahhor koʻchasida yashovchi 25 yoshli Rasul S. yaqin qarindoshlari bilan birga Beruniy tumani “Bunyodkor” MFYda 30 yoshli Venera M. va 39 yoshli Nasiba M.lar bilan oʻzaro janjallashib qolib, janjal davomida Rasul S. qoʻllari va oyoqlari bilan Venera M. va Nasiba M.larning boshi va tanasining turli joylariga urib, qasddan badaniga shikast yetkazgan.
Sud-tibbiy ekspertiza xulosasida, fuqaro Nasiba M.ga ogʻirlik darajasi boʻyicha “yengil” tan jarohati yetkazilganligi koʻrsatilgan.
Mazkur holat yuzasidan 30.12.2020-yilda Qoraqalpogʻiston Respublikasi Beruniy tumani IIB huzuridagi Tergov boʻlimi tomonidan Oʻzbekiston Respublikasi Jinoyat kodeksining 109-moddasi 2-qismi (qasddan badanga yengil shikast yetkazish) bilan jinoyat ishi qoʻzgʻatilgan.
Bundan tashqari, Rasul S. oʻzining jinoiy harakatlarini davom ettirib, takroran 2021-yilning 11-yanvar kuni soat 09:30 da Beruniy tumani “Shabboz” dehqon bozori orqa kirish darvozasi oldida, Venera M.ni boshining tepa qismiga qoʻl va oyoqlari bilan tepib tan jarohati yetkazgan.
Shuningdek, Rasul S. takroran oʻzining akasi Janibek S. va ukalari Jasur S. va Islom S. hamda onasi Dilbar A., opasi Nargiza S.lar bilan Beruniy tumani, “Shabboz” dehqon bozori orqa kirish darvozasi oldida Venera M. va uning opasi Nasiba M. hamda Anora M.larning bozordagi savdo rastasida turgan narsalarini sochib, stollarini sindirib, bu holatni video tasvirga olib turgan video kamerasini tayoq bilan sindirib, oʻzgalar mulkiga zarar yetkazgan.
Dastlabki tergov jarayonida, jinoyat ishi 19.01.2021-yilda JKning 109-moddasi 2-qismidan JKning 277-moddasi 3-qismi “a” bandi - bezorilikka qayta malakalanib, hozirda tergov harakatlari olib borilmoqda.
БЕРУНИЙ БЕЗОРИЛИК