22 nafar mansabdor ishdan olindi

Buxoroda Prezident Xalq qabulxonalariga yuborilgan aholi murojaatlarini ko‘rib chiqishda e’tiborsizlik va mas’uliyatsizligi uchun 22 nafar mansabdor shaxslar egallab turgan lavozimidan ozod qilindi.
Xabarga ko‘ra, 2020-yilda Buxoro viloyati, tuman va shahar Xalq qabulxonalari tomonidan davlat organlari va boshqa tashkilotlarning murojaatlar bilan ishlash faoliyati tizimli o‘rganilgan. Aniqlangan kamchiliklarni bartaraf qilish yuzasidan 644 ta ko‘rib chiqilishi majburiy bo‘lgan taqdimnoma, kamchiliklarga yo‘l qo‘ygan mas’ullarga nisbatan choralar ko‘rish to‘g‘risida 49 ta taklif kiritildi.
“Kiritilgan taqdimnoma va takliflarga asosan kamchiliklar bartaraf qilinishi bilan bir qatorda, davlat organlari va boshqa tashkilotlar xodimlarining 234 nafari ogohlantirildi, 179 nafariga nisbatan ogohlantirish va 26 nafariga nisbatan oylik ish haqining 30 foizigacha jarima intizomiy jazo choralari qo‘llanildi. 22 nafari egallab turgan lavozimlaridan ozod qilindi, 2 nafariga ma’muriy jazo choralari qo‘llanildi”, — deydi Buxoro viloyati Xalq qabulxonasi yetakchi mutaxassisi Ma’mur Rahmonqulov.