Rossiyadan qaytgan fuqaroda taqiqlangan diniy materiallar aniqlandi

Fuqaro oʻzining “Xiaomi” va “Samsung” smartfonlari xotirasida norasmiy diniy tashkilotlarga taalluqli boʻlgan materiallarni saqlagan.
Toshkent aeroportida taqiqlangan diniy materiallarni tarqatgan shaxs qoʻlga olindi. Bu haqda IIV Transportda xavfsizlikni taʼminlash bosh boshqarmasi xabar berdi.
Organ xodimlari Sankt-Peterburg-Toshkent yoʻnalishidagi aviareys bilan uchib kelgan 21 yoshli Qoraqalpogʻiston Respublikasi Xoʻjayli tumanida roʻyxatda turuvchi X.F. bilan profilaktik suhbat oʻtkazgan.
Suhbat natijasida u Rossiyada ishlashi davomida terrorchilik tashkiloti yollovchilarining taʼsiriga tushib, ularning gʻoyalarini qoʻllab-quvvatlashi aniqlangan. U oʻzining “Xiaomi” va “Samsung” smartfonlari xotirasida norasmiy diniy tashkilotlarga taalluqli boʻlgan materiallarni saqlagan. Bundan tashqari, ularni yaqin tanishlariga ijtimoiy tarmoqlari orqali tarqatib kelgan, deb xabar beradi IIV Transportda xavfsizlikni taʼminlash bosh boshqarmasi.