"Qizilsoy"da cho’milgan ayol "samosud" qilindimi?

Ijtimoiy tarmoqlarda “Qizilsoyda choʻmilgan ayol samosud qilindi” sarlavhasi bilan video tarqaldi.
Toshkent viloyati Ichki ishlar bosh boshqarmasi axborot xizmati maʼlum qilishicha, mazkur holat Parkent tumani IIB Navbatchilik qismida 2021-yil 20-iyul kuni roʻyxatga olingan.
Unga koʻra, Parkent tumani, Nevich mahallasida yashovchi 1984-yilda tugʻilgan fuqaro M.M.(ayol) mahalla hududidan oqib oʻtuvchi “Qizilsoy” soyida choʻmilayotgan 1987-yilda tugʻilgan fuqaro D.G.(ayol)ni yoniga borib, bu suvdan isteʼmol qilishlarini aytgan va u bilan janjallashib, D.G.ning egnida boʻlgan kiyimlarini zoʻrlik bilan yechib tashlagan. Uni urib-tepib tan jarohati yetkazgan.
Mazkur holat yuzasidan Parkent tumani IIB huzuridagi Tergov boʻlimi tomonidan Oʻzbekiston Respublikasi JKning 277-moddasi 1-qismi va 140-moddasi 1-qismi bilan jinoyat ishi qoʻzgʻatilib, tergov harakatlari olib borilmoqda.
Jarayonda albatta qonun ustuvorligi va qilmishga yarasha jazoning muqarrarligi taʼminlanib, batafsil maʼlumot beriladi.