Rossiyadagi 6 nafar O’zbekistonlik majburiy mehnatdan ozod qilinishni so’radi

Joriy yilning may oyida ogʻzaki kelishuv asosida 6 nafar Oʻzbekiston fuqarolari Rossiya Federatsiyasi Samara viloyatidagi issiqxonada vaqtincha mehnat faoliyatini amalga oshirish uchun kelgan.
Ish beruvchi yurtdoshlarimizning pasportlarini olib, patent rasmiylashtirgan, lekin hujjatlarini qaytarib bermagan. Shuningdek, oldindan kelishilgan har oy uchun 40 ming rubl ish haqlarining 3 oyligi berilmagan.
Mehnat migrantlari Tashqi mehnat migratsiyasi agentligining Samara viloyatidagi vakolatxonasiga videomurojaat orqali pasportlarini olib berib, majburiy mehnatdan ozod qilinishini soʻragan.
Vakolatxona xodimlari Samara viloyati Kinel shahri ichki ishlar boshqarmasiga fuqarolarimizni majburiy mehnatdan ozod qilishda yordam soʻrab, ariza yozgan. Muammo oʻrganildi va qisqa muddatda ichki ishlar xodimlari bilan birgalikda yurtdoshlarimizning ish joylariga borib, muammolari hal etildi.