Navoiyda tovlamachi ayol jinoyat ustida qoʻlga olindi

2022-yil 9-mart kuni fuqaro N.N. Navoiy viloyat IIB boshligʻi nomiga ariza bilan murojaat qilib, Dildora Boymurodova uni xizmatga oid ma’lumotlarini internet tarmoqlari orqali tarqatish bilan tahdid qilib, ilgari 2022-yil 4-mart kuni undan tovlamachilik yoʻli bilan  3 million soʻm pullarni olganligi  shunga qaramasdan hozirda yana 1500 AQSH dollari miqdorida pullarni talab qilib, kelayotganligini aytib Dildora Boymurodovaga nisbatan qonuniy chora koʻrishni soʻragan. 
Navoiy viloyati IIB xodimlari tomonidan olib borilgan tezkor tadbirlar natijasida 2022-yilning 9-mart kuni 23:36 da Navoiy shahrida joylashgan kafelarning birida Dildora Boymurodova fuqaro N.N dan tovlamachilik yoʻli bilan talab qilgan 1500 AQSH dollar pullarni olgan vaqtida qoʻlga olingan. 
Shundan soʻng fuqaro D.N. Boymurodova yonida boʻlgan ayollar sumkasi xolislar va himoyachi ishtirokida koʻzdan kechirilganda uning sumkasidan tovlamachilik yoʻli bilan olgan 15 dona 100 kupyuralik maxsus kukun yordamida ishlov berilgan jami 1500 AQSH dollari miqdoridagi pullar protsessual tartibda hujjatlashtirib olingan.
Holat yuzasidan viloyat IIB tomonidan Dildora Boymurodovaga nisbatan Oʻzbekiston Respublikasi Jinoyat Kodeksining 165-moddasi 1-qismi bilan jinoyat ishi qoʻzgʻatilib, tergov harakatlari olib borilmoqda. Hozirda D.N.Boymurodova Oʻzbekiston Respublikasi JPK talablari asosida ushlangan. 
Tergov harakatlari insonparvarlik, qonuniylik va odillik tamoyillari asosida olib borilishi ta’minlanadi.
 
Navoiy viloyati IIB Axborot xizmati