MATBUOT FORUMI OʻTKAZILADI

Navoiy shahar xalq taʼlimi mudiri Raʼno Hayitova jurnalistlar bilan uchrashuv oʻtkazdi. 
Tadbir boshlanishdan avval jurnalistlar yana shunday hisobot va uni gazetaga chop etish boʻlsa kerak deb oʻylashardi. Ammo, matbuot anjumani mutlaqo boshqacha ruhda oʻtkazildi.
Raʼno Hayitova tadbirni ochib berar ekan, anjuman rasmiylikdan xoli, oʻzaro hamkorlikka kuch beradigan tadbir boʻlishini taʼkidladi.
-Albatta bu tadbir taʼlim va ommaviy axborot vositalari oʻrtasida muhim burilish yasaydi. Yaqinda “Oʻqituvchi gazeta oʻqishni rad etdi” maqolamiz chop etilgandi. Jamiyatimizning eng katta kuchi va maʼnaviyatli qatlami boʻlgan oʻqituvchilarimiz albatta gazeta oʻqishlari va munozara, muhokama  qilishlari kerak. Oʻquvchi yoshlarimizning ijodiy ishlarini gazetalarda chop ettirib, ularga toʻgʻri yoʻl koʻrsatishimiz kerak. Maʼnaviyat hammaga kerak, - deb taʼkidlaydi “Navoiy ziyosi” gazetasi muharriri Sanjar Qurbonov.
Matbuot anjumanida yigʻilgan maktab direktorlaridan Dilyara Tuxfatullina hozirgi kun jurnalistlari toʻgʻrisida oʻz fikr-mulohazalarini bildirdi:
-  Hozirgi kunda blogerlik avj olib ketdi. Arizmagan kamchilikni internet tarmoqlarida boʻrttirib koʻrsatish ularga xos boʻlib qoldi. Lekin haqiqiy jurnalist bunday holatlarni boshqacha tasvirlaydi, boshqacha yondoshadi. Biz haqiqiy jurnalistlar bilan ishlashimiz kerak. 
Navoiy shahar 13-umumtaʼlim maktabi direktori Ajargul Ibragimova ommaviy axborot vositalari bilan hamkorlikni kuchaytirish maqsadida matbuot forumini oʻtkazish taklifini bildirdi.
 Bu taklifni yigʻilganlar  astoydil qoʻllab-quvvatlashdi.