Ishsiz yoshlarga imtiyozli kredit

O‘zbekiston Respublikasi Prezidentining 2021-yil 27-yanvar kuni “Yoshlar uchun ish o‘rni yaratish va ularning bo‘sh vaqtini mazmunli tashkil etish” masalalariga bag‘ishlab o‘tkazgan videoselektor yig‘ilishida bergan topshiriqlariga asosan, Navoiy viloyatida viloyat hokimligi, Yoshlar ishlari agentligi viloyat boshqarmasi, Bandlik boshqarmasi, shuningdek, tijorat banklari bilan hamkorlikda amaliy ishlar olib borilmoqda. 

Xususan, Konimex tumanining olis cho‘l hududlaridan biri bo‘lgan “Sarjal” OFYdagi ishsiz 18 nafar yoshlar bandligini ta’minlash maqsadida 15 boshdan mayda shoxli mol berildi. Imtiyozli kredit asosida berilayotgan bu imkoniyat yoshlarning chorvachilik sohasidagi ilk qadamlari bo‘ldi. 

– Men, “Sarjal” OFY qarashli “Teriquduq” ovulidanman. Men ham bugun tengdoshlarim qatori naslli qo‘y oldim. Niyatim, o‘z chorvachilik faoliyatimni kengaytirib, yurtim ravnaqiga beminnat hissamni qo‘shishdir, – deydi Yerjan Asanov.