Boshqa kompaniya brendidan foydalanib tuz sotgan korxona aniqlandi

Xorazm viloyatida “Xonqa billur salt” oʻzbek-turk qoʻshma korxonasiga tegishli “Saodat” osh tuzi mahsulotiga oʻxshash brend va qadoqda tuz ishlab chiqarib sotayotgan korxona aniqlandi. Bu haqda Monopoliyaga qarshi kurashish qoʻmitasi matbuot xizmati xabar berdi.
Xabarga koʻra, “Sadaf” osh tuzi nomi bilan tuz ishlab chiqarib sotayotgan “Shovot white salt” xususiy tadbirkorlik subyekti raqobatga oid qonunchilikni buzgani aniqlangan. Ayrim xaridorlar “Sadaf” tuzini “Saodat” deb oʻylab sotib olgan va sifatsizlik boʻyicha eʼtirozlarini “Saodat”ga yoʻllagan.
Qayd etilishicha, bu holat isteʼmolchilarni adashtirishi mumkinligi tasdiqlangan va tegishli tashkilotlar tomonidan “Sadaf”ni ishlab chiqarishni toʻxtatish boʻyicha majburiy koʻrsatma berilgan. Koʻrsatma bajarilmasa, ish javobgarni maʼmuriy javobgarlikka tortish uchun sudga yuboriladi.