15 kg.dan ortiq giyohvandlik moddalari aniqlandi

Samarqand viloyati IIB Axborot xizmatining xabariga koʻra, Urgut tumani boʻyicha IIO FMB profilaktika inspektorlari tomonidan fuqarolarning xonadonlarida profilaktik tadbirlar oʻtkazish davomida, tumanning “Pochvon” mahallasida yashovchi, 1970-yilda tugʻilgan S.A. oʻzini shubhali tutganligi sababli, uning yoni tekshirilganida, choʻntagida 4 dona gugurt qutida marixuana giyohvandlik moddasi borligi, surishtiruv davomida u ushbu giyohvand moddalarini tanishi B.A.dan olganligi aniqlangan.
B.A.ning hovlisi xolislar ishtirokida koʻzdan kechirilganida, tomorqasida 76 tup kannabis giyohvandlik oʻsimligini ekib, parvarishlab kelayotganligi aniqlangan.
Shuningdek, ushbu shaxsning yashash xonadoni koʻzdan kechirilganida, javonida 15 kg marixuanna (sof ogʻirligi 11 kg. dan ortiq) giyohvandlik moddalarini saqlab kelayotganligi aniqlanib, tegishli tartibda hujjatlashtirilgan.
Mazkur holat yuzasidan Urgut tumani IIB huzuridagi Tergov boʻlimi tomonidan Oʻzbekiston Respublikasi JKning 25,273-moddasi 5-qismi bilan jinoyat ishi qoʻzgʻatilib, dastlabki tergov harakatlari davom ettirilmoqda.