Polizda yetishtirilgan og’u fosh etildi

Mamlakatimizda giyohvandlik vositalarini oʻstirish, tayyorlash, sotish va isteʼmol qilish qonun bilan taqiqlanib, jinoyat kodeksining tegishli moddalari bilan jinoiy jazo belgilangan.
Biroq, ayrim shaxslar tomonidan zahriqotillarni yetishtirish va ularning savdosi bilan shugʻullanish holatlari hamon uchramoqda.
Surxondaryo viloyati bojxona boshqarmasi Kontrabandaga qarshi kurashish va bojxona auditi boʻlimi xodimlari tomonidan viloyat IIB va DXX   boshqarmalari xodimlari bilan xamkorlikda narkotik moddalarning noqonuniy muomalasiga qarshi kurashish boʻyicha Jarqoʻrgʻon tumanida tezkor tadbir oʻtkazildi.
Tadbir davomida Jarqoʻrgʻon tumanida yashovchi fuqaro A.E. tomonidan parvarishlab kelinayotgan poliz ekinlari ekilgan yer maydoni xizmat iti yordamida xolislar ishtirokida koʻzdan kechirildi.
Natijada, ushbu yer maydonida 1 tup “Nasha” giyohvandlik oʻsimligi va supaning tag qismida qora rangli paketga joylangan jami 545 gramm “Marixuana” giyohvandlik vositasi borligi aniqlandi.
Hozirda mazkur holat yuzasidan bojxona organlari tomonidan tergovga qadar tekshiruv harakatlari olib borilmoqda.